Türkmenistanyň Prezidenti Serdar Berdimuhamedow we türkmen halkynyň Milli Lideri, Türkmenistanyň Halk Maslahatyň Başlygy Gurbanguly Berdimuhamedow Gazagystan Respublikasynyň Prezidenti Kasym-Žomart Tokaýewe ýurduň Karagandy oblastynda ýerleşýän “Kostenko” magdan käninde bolup geçen ýangynyň köp sanly adam pidalaryna we şikes ýetmelere getirmegi zerarly gynanç hatlaryny iberdiler. Bu barada Türkmenistanyň resmi metbugaty şenbe güni habar berdi.
Türkmenistanyň Prezidenti hem-de türkmen halkynyň Milli Lideri Türkmenistanyň Hökümetiniň adyndan, şeýle hem öz atlaryndan şu agyr pursatda gurban bolanlaryň ähli dogan-garyndaşlaryna hem-de ýakynlaryna ýürekden gynanjyny, medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdiler.
“Gazagystan Respublikasynyň Karagandy oblastynda ýerleşýän Kostenko adyndaky şahtada bolup geçen ýangynyň köp sanly adam pidalaryna we şikes ýetmelere getirendigi baradaky habary çuňňur gynanç duýgusy bilen kabul etdim” diýlip, Türkmenistanyň Halk Maslahatynyň Başlygy Gurbanguly Berdimuhamedowyň hatynda nygtalýar.
Gazagystan Respublikasynyň Adatdan daşary ýagdaýlar ministrliginiň ýekşenbe güni mälim etmegine görä, magdanda bolup geçen ýangynda heläk bolanlaryň sany 42-ä ýetip, ýene 4 magdançy dereksiz ýitdi.
