Çarşenbe güni Aşgabatda “Merkezi Aziýa-Koreýa Respublikasy” hyzmatdaşlyk forumynyň çäklerinde Daşary işler ministrleriniň 16-njy mejlisi geçirildi. Bu barada Türkmenistanyň daşary işler ministrligi habar berdi.
Merkezi Aziýa ýurtlarynyň we Koreýa Respublikasynyň daşary syýasat edaralarynyň ýolbaşçylarynyň mejlisi ýaşlaryň ägirt uly mümkinçiliklerini durmuşa geçirmek arkaly durnukly geljegi üpjün etmek maksadyna bagyşlandy. Foruma gatnaşyjylar ähmiýetli sebit meseleleri, foruma gatnaşýan her bir döwletde ýaşlar syýasatynyň durmuşa geçirilişi, şeýle hem, milli meýilnamalaryň we maksatnamalaryň çäginde amala aşyrylýan anyk çäreler barada beýan etdiler. Halkara tagallalary birleşdirmek, hususan-da, durnukly ösüş maksatlaryna ýetmekde ýaşlaryň özara hyzmatdaşlygyna degişli wajyp başlangyçlaryň hem-de pikirleriň birnäçesi öňe sürüldi.
Forumyň çäklerinde türkmen tarapy ýakyn geljekde bilelikdäki tagallalary ýaşlar syýasatynyň ugry boýunça hyzmatdaşlyga gönükdirmekligiň hem-de Merkezi Aziýa we Koreýa Respublikasynyň ýaşlarynyň arasynda halkara hyzmatdaşlygy boýunça strategiýasyny taýýarlamaklygyň maksadalaýykdygyny belledi. Degişli resminamanyň esasy mazmuny bilim we ylym, sport hem-de medeniýet ýaly möhüm ugurlary öz içine alar. “Ikitaraplaýyn diplom” makstanamalary, sanly bilimi ösdürmek, Halkara talyplara merkezini we Ýaşlaryň innowasion pikirlerini ornaşdyrmak we ösdürmek boýunça instituty döretmek, halkara ýaşlar sport oýunlaryny guramak teklip edildi.
“Ýaş zehinler” maksatnamasyny işläp düzmek, 2025-2030-njy ýyllar üçin medeni hyzmatdaşlygyň Ýol kartasyny taýýarlamak, Merkezi Aziýanyň we Koreýa Respublikasynyň ýaşlarynyň halkara sport oýunlaryny geçirmek hem-de beýleki başlangyçlar öňe sürüldi.
Şeýle hem, Koreýanyň halkara hyzmatdaşlygy boýunça agentligi (KOICA), Koreý gaznasy (KF), Ählumumy ýaşyl ösüş instituty (GGGI), şeýle hem milli we halkara hyzmatdaşlar bilen ýakyn aragatnaşygyň ösdürilmeginiň wajyplygy bellenildi.
Gepleşikleriň dowamynda gatnaşyjylar özara gatnaşyklaryň ileri tutulýan ugurlaryny, has takygy, koreý işewürleri bilen bilelikdäki taslamalary durmuşa geçirmegi öz içine alýan ykdysady hyzmatdaşlygy möhüm ugur hökmünde kesgitlediler. Taraplar halklaryň taryhy we medeni arabaglanyşygyny, sebitiň milli gymmatlyklarynyň hem-de ahlak garaýyşlarynyň meňzeşligini hasaba almak bilen, geljegi uly ugurlarda tagallalary birleşdirmegiň zerurlygyny nygtadylar.
Aşgabat forumy ylym, bilim, lukmançylyk, syýahatçylyk, daşky gurşawy goramak ulgamlarynda özara gatnaşyklary we ykdysady mümkinçilikleri artdyrmagyň wajyplygyny ýüze çykardy.
Forumyň netijeleri boýunça Daşary işler ministrleriniň bilelikdäki beýannamasy kabul edilip, 2024-nji ýyl üçin iş maksatnamasy tassyklanyldy.
Forumyň indiki mejlisini 2024-nji ýylda Koreýa Respublikasynda geçirmek meýilleşdirildi.
