Türkmenistanyň Prezidenti Serdar Berdimuhamedow Ykdysady Hyzmatdaşlyk Guramasynyň 16-njy sammitine gatnaşmak üçin Özbegistan Respublikasynyň Daşkent şäherinde iş saparynda bolar. Bu sapara görülýän taýýarlyk işleri barada Ministrler Kabinetiniň Başlygynyň orunbasary, daşary işler ministri Raşid Meredow penşenbe güni geçirilen nobatdaky Hökümet mejlisinde Türkmenistanyň döwlet Baştutanyna hasabat berdi.
Mejlisiň barşynda Raşid Meredow Türkmenistanyň häzirki wagtda Ykdysady Hyzmatdaşlyk Guramasynda başlyklyk edýändigini belledi. Şunuň bilen baglylykda, YHG-nyň giňişliginde söwda-ykdysady, maýa goýum, ulag-logistika, energetika, şeýle hem medeni-ynsanperwer ulgamlarda özara bähbitli hyzmatdaşlygy işjeňleşdirmäge gönükdirilen degişli Konsepsiýa işlenip taýýarlanyldy. Guramanyň soňky sammiti 2021-nji ýylyň 28-nji noýabryndaAşgabatda geçirildi.
UzDaily.uz neşiriniň habara bermegine görä, penşenbe güni Daşkent şäherinde Ykdysady Hyzmatdaşlyk Guramasyna agza döwletleriň ulg ministrleriniň 12-nji mejlisi geçirildi. Onyň barşynda söwda we ulag pudaklarynda hyzmatdaşlygy çuňlaşdyrmagyň ugurlary, şeýle hem ösüş strategiýalary, sebitiň ulag geçelgelerini sazlaşykly ulanmagyň we täzelerini döretmegiň meseleleri maslahatlaşyldy.
Ykdysady Hyzmatdaşlyk Guramasy – bu sebit döwletleriniň ykdysady ösüşini utgaşdyrmak üçin döredilen guramadyr. Azerbaýjan, Owganystan, Eýran, Gazagystan, Gyrgyzystan, Pakistan, Täjigistan, Türkmenistan, Türkiýe we Özbegistan bu guramanyň agzalarydyr. YHG 1985-nji ýylda Eýranyň, Pakistanyň we Türkiýäniň başlangyjy bilen esaslandyrylyp, Türkmenistan bu gurama 1992-nji ýylda agza boldy.
