Türkmenistan bilen ÝB diplomatik gatnaşyklaryň ýola goýulmagynyň 30 ýyllygyny belleýär

Türkmenistan bilen Ýewropa Bileleşigi (ÝB) diplomatik gatnaşyklarynyň ýola goýulmagynyň 30 ýyllygyny belleýär. Bu wakanyň şanyna Ýewropa Bileleşiginiň Aşgabatdaky wekilhanasy Türkmenistandaky ÝB-niň Medeniýet hepdeliginiň çäginde metbugat ýygnagyny geçirdi.

Metbugat ýygnagyna Ýewropa Bileleşiginiň ilçisi Beata Peksa, Türkmenistanyň daşary işler ministriniň orunbasary Mähri Bäşimowa, BOMCA maksatnamasynyň, “Erasmus” maksatnamasynyň, Ýewropanyň Täzeleniş we ösüş bankynyň (ÝTÖB), “Ready4Trade” taslamasynyň we köpçülikleýin habar beriş serişdeleriniň wekilleri gatnaşdylar.

Çäräniň başynda Mähri Bäşimowa we Beata Peksa ÝB bilen Türkmenistanyň arasyndaky gatnaşyklara kanagatlanma bildirdiler we ikitaraplaýyn hyzmatdaşlygy mundan beýläk-de pugtalandyrmak isleýändiklerini tassykladylar.

Metbugat ýygnagynyň dowamynda Merkezi Aziýada serhetleri dolandyrmak Maksatnamasynyň (BOMCA 10) wekili Rustam Berdiýew maksatnamanyň işi we täze taslamalar, şeýle hem Türkmenistanyň Döwlet gümrük gullugy üçin 2024-nji ýylda işe goýberilmegi meýilleşdirilýän mobil goşundy barada gürrüň berdi. Bu mobil goşundyda ulanyjylar elektron hyzmatlardan, nyrh hasaplaýjydan peýdalanyp, şeýle hem Türkmenistanyň Kanunlary bilen tanyşyp bilerler.

Ýewropa Bileleşiginiň medeniýet hepdeligi 10-njy noýabrdan 3-nji dekabra çenli dowam edip, onuň barşynda birnäçe çäreleriň geçirilmegine garaşylýar. Medeniýet hepdeliginiň jemleýji çäresi hökmünde Mary welaýatynda Türkmenistanyň Döwlet simfoniki orkestri bilen bilelikde Wita Timermame Mooranyň ýolbaşçylygyndaky Mary çagalar horunyň konserti geçiriler.