Türkmenistanyň Prezidenti Serdar Berdimuhamedow ýurduň halkynyň we Hökümetiniň adyndan, şeýle hem hut öz adyndan Frederik X-a Daniýanyň Patyşasy hökmünde tagta geçmegi mynasybetli tüýs ýürekden gutlaglaryny, iň gowy arzuwlaryny iberdi. Bu barada Türkmenistanyň resmi metbugaty duşenbe güni habar berdi.
“Siziň hökümdarlyk etmegiňizde Daniýanyň durmuş-ykdysady babatda ýokary ösüşleri gazanjakdygyna, ikitaraplaýyn gatnaşyklarymyza bolsa täze itergi beriljekdigine ynanýaryn” diýlip, Türkmenistanyň döwlet Baştutanynyň gutlag hatynda bellenilýär.
Türkmenistanyň Prezidenti şu mümkinçilikden peýdalanyp, Patyşa Frederik X-a berk jan saglyk, bagtyýarlyk, abadançylyk, Daniýanyň halkyna bolsa parahatçylyk, öňegidişlik we gülläp ösüş arzuw etdi.
“Reuters” agentliginiň habar bermegine görä, Frederik X Daniýanyň Şa aýaly hökmünde 52 ýyl höküm süren ejesi Margrete II -niň tagtdan meýletin ýüz öwürenligi sebäpli Daniýanyň Patyşasy hökmünde tagta geçdi.
