Türkmenistanyň daşary işler ministri Raşid Meredowyň ýolbaşçylygyndaky türkmen wekiliýeti Tokio şäherine iş saparynyň çäginde 2024-nji ýylyň 22-23-nji ýanwarynda Ýaponiýanyň daşary söwda guramasynyň (JETRO) ýerine ýetiriji direktory hem-de başlygy Işiguro Norohiko bilen duşuşyk geçirdi. Duşuşykda taraplar Türkmenistanyň Ýaponiýada söwda öýüni açylmak mümkinçilikleri boýunça pikir alyşdylar.
“JETRO” guramasynyň wekilleri bilen geçirilen duşuşykda “JETRO” guramasynyň Türkmenistandaky wekilhanasynyň açylmagynyň mümkinçilikleri boýunça pikir alşyldy. Şeýle-de şu ýylyň birinji ýarymynda türkmen tarapynyň “JETRO” guramasy bilen bilelikde işewürlik forumyny geçirmek boýunça meýilleri beýan edildi. Bu barada Türkmenistanyň DIM-i habar berdi.
Şeýle hem türkmen wekiliýeti Ýaponiýanyň Eksport we maýa goýum ätiýaçlandyryş guramasynyň (NEXI) ýerine ýetiriji direktory hem-de başlygy Asuo Kuroda bilen duşuşyklary geçirdi.
Gepleşikleriň dowamynda maýa goýum ulgamynda hyzmatdaşlygyň täze ugurlary, hususan-da, Türkmenistanda ähmiýeti uly bolan taslamalaryň maliýeleşdirilmegine dürli maýa goýum guramalarynyň çekilmeginiň mümkinçilikleri ara alyp maslahatlaşyldy.
Mundan başga-da, Türkmenistanyň daşary işler ministri Raşid Meredow bilen Ýaponiýanyň daşary işler ministri Ýoko Kamikawanyň arasynda 2024-nji ýylyň 23-nji ýanwarynda Tokio şäherinde geçirilen duşuşykda şu ýylyň dowamynda iki ýurduň döwlet Baştutanlarynyň duşuşygynyň guralmagynyň maksadalaýyk boljaklygy bellenildi.
