Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow sişenbe güni Aşgabatda Türki Döwletleriň Guramasynyň (TDG) Aksakgallar geňeşiniň başlygy Binali Ýyldyrym bilen duşuşdy. Bu barada Türkmenistanyň resmi metbugaty habar berdi.
Duşuşygyň çäklerinde Aksakgallar geňeşiniň mejlisiniň jemleri jemlenildi, guramanyň geljekki işleriniň, şeýle hem iki ýurduň arasyndaky gatnaşyklary ösdürmegiň meseleleri ara alnyp maslahatlaşyldy.
Binali Ýyldyrym Aksakgallar geňeşiniň mejlisine gatnaşyjylaryň adyndan Türkmenistanyň Prezidenti Serdar Berdimuhamedowa we Türkmenistanyň Halk Maslahatynyň Başlygy Gurbanguly Berdimuhamedowa forumyň ýokary guramaçylyk derejesi hem-de Türkmenistanda mähirli garşylanandygy üçin tüýs ýürekden hoşallyk bildirdi.
Türkmen halkynyň Milli Lideri hem-de Aksakgallar geňeşiniň başlygy gurama agza ýurtlaryň arasynda dost-doganlyk gatnaşyklaryny ösdürmek, hususan-da, medeni-ynsanperwer dialogy giňeltmek üçin tagallalary birleşdirmek barada pikir alyşdylar.
Şeýle-de Gurbanguly Berdimuhamedow ykdysadyýet, söwda, ulag, energetika, maýa goýumlar ulgamlarynda netijeli gatnaşyklary ösdürmekde Aksakgallar geňeşiniň agzalaryna aýratyn orun degişlidigini belläp, Binali Ýyldyryma geňeşiň işiniň ýokary derejede alnyp barylýandygy üçin minnetdarlyk bildirdi.
Duşuşygyň ahyrynda TDG-nyň Aksakgallar geňeşiniň başlygy Binali Ýyldyrym Türki Döwletleriň Guramasynyň öňünde durýan wezipeleri bilelikde üstünlikli çözmekde ähli zerur tagallalary etjekdigine ynandyrdy.
Türkmen halkynyň Milli Lideri, Türkmenistanyň Halk Maslahatynyň Başlygy, Türki Döwletleriň Guramasynyň (TDG) Aksakgallar geňeşiniň agzasy Gurbanguly Berdimuhamedowyň başlyklyk etmeginde 2024-nji ýylyň 12-nji martynda Aşgabatda Türki Döwletleriň Guramasynyň Aksakgallar geňeşiniň 15-nji mejlisi geçirildi.
25382-90x604.jpg)
