Türkmenistanyň Mary welaýatynda Arassaçylyk we keselleriň ýaýramagyna garşy göreşmek gullugynyň täze edara binasy açyldy. Bu barada Türkmenistanyň resmi metbugaty anna güni habar berdi.
Toplum welaýat gullugynyň arassaçylyk, öňüni alyş, keselleriň ýaýramagyna garşy göreşmek we barlag-anyklaýyş bölümlerini birleşdirýän bäş sany edara binasyndan ybaratdyr.
“Rosche Diagnostics”, “Newster” we “Thermo Fisher Scientific” ýaly dünýä belli önüm öndürijileriň öňdebaryjy enjamlary bilen enjamlaşdyrylan döwrebap barlaghanalar kesellere garşy göreşmegiň täzeçil usullaryny ornaşdyrmaga we möhüm barlaglary geçirmäge mümkinçilik berýär.
Germaniýanyň “KTQ International” kompaniýasy täze desganyň saglygy goraýyşyň ýokary ülňülerine laýyk gelýändigi baradaky güwänamany berdi, “VS Vereinigte Spezialmöbelfabriken GmbH & Co.KG” kompaniýasy bolsa onuň sebitdäki iň ýokary tehnologiýa taslamasydygyny tassyklady.
Türkmenistanyň Prezidenti Serdar Berdimuhamedow bu edara ýöriteleşdirilen göçme barlaghana awtoulagy we hünärmenleriň gatnadylmagy üçin gulluk awtomobilleri sowgat etdi. 2 gektar çägi eýeleýän merkez abadanlaşdyrylyp gurlan ýollary, pyýada ýodalary we ýaşyl zolaklary özünde jemleýär.
Ozal habar berşimiz ýaly, Türkmenistanyň paýtagty Aşgabatda 400 orunlyk Halkara sagaldyş-dikeldiş merkeziniň, 250 orunlyk Halkara fiziologiýa ylmy-kliniki merkeziniň açylyş dabaralary geçirildi.
