“Türkmengaz” döwlet konserni bilen “NefteHimSerwis” kompaniýasy Türkmenistanda önümçilik desgalaryny döwrebaplaşdyrmak we gurmak boýunça täze taslamalaryň işlenip taýýarlanylmagyny öz içine alýan nebithimiýa senagaty pudagynda hyzmatdaşlygy mundan beýläk-de giňeltmek meselelerini maslahatlaşdylar.
Türkmenistanyň resmi metbugatynyň habar bermegine görä, bu meselä “Türkmengaz” DK-niň başlygy Maksat Babaýewiň “NefteHimSerwis” kompaniýasynyň baş direktory Ýuriý Grigorenko bilen bolan duşuşygynyň dowamynda garaldy.
Taraplar uglewodorod serişdeleriniň gaýtadan işlenişiniň netijeliligini ýokarlandyrmak we önümçiligiň ekologiýa howpsuzlygyny gowulandyrmak üçin innowasion tehnologiýalaryň ornaşdyrylyşyny maslahatlaşdylar.
Duşuşyga gatnaşyjylar maýa goýum we halkara kompaniýanyň Türkmenistanyň nebitgaz pudagyndaky taslamalara gatnaşmak mümkinçiliklerine aýratyn üns berdiler. Söhbetdeşler uzakmöhletleýin hyzmatdaşlygyň we bilelikdäki taslamalary üstünlikli durmuşa geçirmegiň möhümdigini bellediler.
Duşuşygyň ahyrynda taraplar geljekde hem netijeli hyzmatdaşlyk etjekdiklerine ynam bildirdiler.
“NefteHimSerwis” – bu nebithimiýa önümçiligine we uglewodorod serişdeleri gaýtadan işlemekde tehnologiýa çözgütleri işläp taýýarlamaga ýöriteleşen kompaniýasydyr. Ol senagat desgalaryny döwrebaplaşdyrmak we gurmak, nebitiň gaýtadan işlenişiniň netijeliligini hem-de ekologiýa howpsuzlygyny ýokarlandyrmak üçin innowasion tehnologiýalary ornaşdyrmak boýunça iş alyp barýar.
