Anna güni Türkmenistanyň paýtagty Aşgabatda Merkezi Aziýada raýatsyzlygyň soňuna çykmak boýunça ministrler derejesinde sebitleýin maslahaty geçirildi. Onda sebit ýurtlarynyň wekilleri degişli ugurda bilelikdäki çäreleri ara alyp maslahatlaşdylar. “Ýyldyz’ myhmanhanasynda geçirilen çärä Türkmenistanyň Daşary işler ministrliginiň, Döwlet migrasiýa gullugynyň wekilleri, Merkezi Aziýa ýurtlarynyň, halkara bilermenleri we köpçülikleýin habar beriş serişdeleri wekilleri gatnaşdylar.
Türkmenistanyň Döwlet migrasiýa gullugynyň başlygy Amanmuhammet Sazakow maslahaty açyp, raýatsyzlygyň doly soňuna çykmaga ýurduň ygrarlydygyny nygtady. Ol Türkmenistanyň BMG-niň “Men degişli” (#IBELONG) atly taslamasyny işjeň goldaýandygyny we ýakynda BMG-niň Bosgunlaryň işi baradaky Ýokary komissarynyň müdirliginiň mejlisinde raýatlygy bolmadyk adamlaryň hukuklaryny goramaga gönükdirilen birnäçe başlangyçlary öňe sürendigini belledi.
Çäräniň dowamynda gatnaşyjylar 2019 – 2024-nji ýyllarda raýatsyzlygyň soňuna çykmak boýunça Türkmenistanyň hereketleriniň milli meýilnamasyny ara alyp maslahatlaşdylar. Gurbanguly Berdimuhamedowyň başlangyçlary bilen we Türkmenistanyň Prezidenti Serdar Berdimuhamedowyň baştutanlygynda halkara parahatçylyk başlangyçlaryny goldamakda ýurduň tagallalaryna aýratyn üns berildi.
BMG-niň Bosgunlaryň işi baradaky Ýokary komissarynyň müdirliginiň we Merkezi Aziýa ýurtlarynyň wekilleri raýatlygy bolmadyk adamlaryň goraglylygy we jynsy sütemleriň pidalaryna ýardam etmek babatda özara tejribe alyşdylar. Gatnaşyjylar doglan ýeri boýunça raýatlygy ykrar etmäge gönükdirilen “#IBELONG” taslamasynyň çäklerindäki ilerlemeleri ara alyp maslahatlaşyp, Raýatsyzlygyň soňuna çykmak boýunça ählumumy birleşigiň işleriniň möhüm ähmiýetini bellediler.
Maslahat raýatlygy bolmadyk adamlaryň hukuklaryny goramakda we olaryň hukuk ýagdaýynyň kesgitlenilişindäki düzgünleri kämilleşdirmekde Merkezi Aziýada hereketleriň utgaşdyrylmagyny göz öňünde tutýan jemleýji resminamalara gol çekilmegi bilen tamamlandy.
2024-nji ýylyň 25-nji sentýabrynda Aşgabatda Türkmenistanyň täze raýatlaryna pasportlary gowşurmak dabarasy geçirildi. Şonda Türkmenistanyň çäginde ýaşaýan 29 milletiň wekili bolan 1146 adam Türkmenistanyň raýatlygyny aldylar. Mundan başga-da, Türkmenistanyň Prezidenti Serdar Berdimuhamedowyň Kararyna laýyklykda, 6 döwletiň raýaty we 15 milletiň wekili bolan 134 adam Türkmenistanda ýaşamaga ygtyýarnama aldylar.
