Türkmen telekeçileri 2024-nji ýylyň 5-nji dekabrynda Gazagystanyň paýtagty Astanada geçiriljek II Halkara maýa goýum forumyna we “Aziýa Agro Gaýtadan işlemek 4.0” sergisine gatnaşmaga çagyrylýar. Bu barada TSTB penşenbe güni habar berdi.
Bu çäre oba hojalyk önümleriň gaýtadan işlenilişinde öňdebaryjy tehnologiýalary ornaşdyrmaga we ösdürmäge bagyşlanar.
Forum geçen ýyl Germaniýa, Şweýsariýa, Eýran, Polşa, Russiýa ýaly ýurtlardan 200-den gowrak gatnaşyjyny we bilermeni özünde jemläp, iň täze çözgütleri maslahatlaşmak hem-de tejribe alyşmak üçin amatly meýdançany hödürledi.
Türkmenistanyň Daşary işler ministrligi şu ýylyň 2-5-nji dekabry aralygynda geçiriljek çärelere netijeli gatnaşmaga gyzyklanma bildirýän taraplara ähli zerur bolan döwlet maglumatlaryny hödürlemek bilen ýardam etmäge taýýardygyny beýan edýär.
“Aziýa Agro Gaýtadan işlemek 4.0” sergisi hünär taýdan alyşmak we tanyşlyk üçin oba hojalyk işewürliginiň wekillerini, gaýtadan işleýän enjamlary öndürijileri, maliýe, hyzmat ugurly kompaniýalary, pudagyň dürli ýurtlardaky bilermenlerini we tejribelerini, döwlet düzümleriniň wekillerini hem-de beýleki gyzyklanma bildirýän gatnaşyjylary birleşdirýän ýöriteleşdirilen meýdançadyr.
