Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň wise-prezidenti Oguljahan Atabaýewanyň sişenbe güni Aşgabatda Ministrler Kabinetiniň Başlygynyň medeniýet ulgamyna gözegçilik edýän orunbasary hem-de köpçülikleýin habar beriş serişdeleriniň zenan ýolbaşçylary bilen duşuşygy boldy. Onuň barşynda ýaşlaryň saglyk ýagdaýy we olaryň döredijilik başarnyklaryny ösdürmek bilen bagly meseleler ara alnyp maslahatlaşyldy.
“Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahata taýýarlyk duşuşygyň möhüm meselesi boldy. Gaznanyň döredilmeginiň 4 ýyllygyna bagyşlanyp geçiriljek maslahat saglygy gorap saklamagyň we ýaş nesliň mümkinçiliklerini açmagyň ähmiýetine ünsi çekmekden ybaratdyr. Bu barada Türkmenistanyň resmi metbugaty habar berýär.
Täze taslama – 4-den 11 ýaşa çenli çagalaryň arasynda geçirilmegi meýilleşdirilýän döredijilik bäsleşigine aýratyn üns berildi. Oňa gatnaşjak çagalar üç ugur boýunça: surat çekmek, amaly-haşam sungaty, aýdym-saz we tans sungaty, türkmen milli oýunlary boýunça öz başarnyklaryny synap bilerler.
Oguljahan Atabaýewa dört ýyla golaý döwrüň dowamynda 500-den gowrak näsag çaganyň saglygyny dikelden, Türkmenistanyň ähli künjeklerinde hereket edýän çagalar hassahanalaryna döwrebap saglygy goraýyş enjamlaryny oturdan Gaznanyň ýeten sepgitlerini wagyz etmegiň möhümdigini belledi. Gaznanyň wise-prezidenti şeýle hem Gaznanyň milli we halkara giňişlikde amala aşyrýan ynsanperwer taslamalarynyň ähmiýetini wagyz etmekde köpçülikleýin habar beriş serişdeleriniň işiniň ähmiýetini belledi.
Habarda bellenilişi ýaly, Haýyr-sahawat gaznasynyň işini ilerletmekde Türkmenistanyň Saglygy goraýyş we derman senagaty ministrliginiň Saglygy goraýşyň habarlar merkezi bilen hyzmatdaşlyga möhüm orun degişlidir. Gaznanyň alyp barýan işine degişli makalalar taýýarlanylanda täzeçil esasda çemeleşilmelidir. Beýan edilýän maglumatlary ýurduň içindäki we daşyndaky okyjylara düşnükli ýetirmek üçin häzirki zaman tejribelerinden peýdalanmaga ähmiýet berilmelidir.
