Aşgabat şäheriniň jemagat hojalyk gulluklarynyň awtoulag parky 194 sany ýöriteleşdirilen tehnika bilen täzelendi. Degişli tehnikalar paýtagtymyzyň şäher häkimligine gowşuryldy. Bu barada Türkmenistanyň resmi metbugaty habar berýär.
Bu ýöriteleşdirilen tehnikalar şäheriň arassaçylyk ulgamyny berkitmäge hem-de şäher infrastrukturasynyň tehniki hyzmatynyň hilini ýokarlandyrmaga gönükdirildi.
Bu tapgyrda esasy üns durmuş galyndylaryny ýygnamak we daşamak ulgamyny kämilleşdirmäge gönükdirilen dürli görnüşli 100 sany döwrebap zibil daşaýan ulaglar, adaty konteýnerler üçin gapdaldan ýükleýän çalasyn ulaglar, şeýle hem yzdan ýükleýän kuwwatly awtomobiller we göwrümi 20 kub metre ýetýän iri göwrümli konteýner daşaýan ulaglar bar.
Tehnikalar diňe bir dykyz ýaşaýyş toplumlaryna däl, eýsem şäheriň iri senagat ýa-da söwda zolaklaryna hem netijeli hyzmat etmäge şert döreder.
Ýol-hyzmat pudagyna suw sepiji we ýuwujy ulaglar hem-de suw we galyndy üçin niýetlenen uly göwrümli baklary bolan utgaşdyrylan süpüriji-arassalaýjy awtomobiller gowşuruldy.
Şeýle-de üpjünçilik düzümine gurluşyk we kömekçi tehnikalar — ekskawator-ýükleýjiler, ýük ulaglary, teleskopik gurnamalar, göçme ussahanalar hem-de gulluk awtobuslary tabşyryldy.
Awtoulag parkynyň täzelenmegi jemagat hojalyk gulluklarynyň işiniň netijeliligini ýokarlandyrmaga, şeýle hem Aşgabadyň şäher gurşawynyň ýagdaýyny has-da gowulandyrmaga gönükdirilendir.
