Türkmenistanyň Daşary işler ministri Raşid Meredow bilen Eýranyň Daşary işler ministri Seýed Abbas Arakçi 2026-njy ýylyň 4-nji maýynda telefon arkaly geçirilen söhbetdeşlikde sebit howpsuzlygy meseleleri boýunça pikir alyşdylar hem-de gapma-garşylyklaryň öňüni almak maksady bilen öňüni alyş diplomatiýasynyň syýasy-diplomatik usullaryny ulanmagyň möhümdigini nygtadylar. Bu barada Türkmenistanyň DIM-i habar berýär.
Şeýle hem söhbetdeşler ikitaraplaýyn gatnaşyklaryň häzirki ýagdaýyny we özara gyzyklanma döredýän halkara gün tertibini ara alyp maslahatlaşdylar.
Mundan başga-da Hazar deňiz meselelerine aýratyn üns berildi. Taraplar Hazar deňziniň parahatçylygyň, agzybirligiň we hoşniýetli goňşuçylygyň giňişligi bolup galmalydygyny bellediler, şeýle hem ekologik meseleleriň çözülmeginde köptaraplaýyn hyzmatdaşlygy işjeňleşdirmegiň zerurdygyny nygtadylar.
Daşary syýasat edaralarynyň ýolbaşçylary diplomatik dialogy mundan beýläk-de ösdürmäge gyzyklanma bildirýändiklerini tassykladylar we daşary işler ministrlikleriniň ugry boýunça yzygiderli gatnaşyklary dowam etdirmek barada ylalaşdylar.
Telefon arkaly gepleşik eýran tarapynyň başlangyjy bilen geçirildi.
