Daşkent şäherinde duşenbe güni geçirilen duşuşygyň netijeleri boýunça “Aýdyň Gijeler” hojalyk jemgyýeti bilen Daşkent şäher häkimliginiň arasynda hyzmatdaşlyk hakynda Ähtnama gol çekildi. Bu resminama Özbegistanda “Aýdyň Gijeler” hojalyk jemgyýetiniň täze önümçilik meýdançasyny döretmegi göz öňünde tutýar.
Duşuşygyň dowamynda taraplar senagat hyzmatdaşlygyny ösdürmek we Özbegistan Respublikasynyň çäginde bilelikdäki infrastruktura taslamalaryny durmuşa geçirmek meselelerini ara alyp maslahatlaşdylar. Taslamany amala aşyrmak üçin umumy meýdany 4 gektar bolan ýer bölegi bölünip berildi. Bu barada “Aýdyň Gijeler” kompaniýasynyň resmi metbugaty duşenbe güni habar berdi.
Täze önümçilik desgasy Özbegistanyň iri ulag-infrastruktura taslamalary üçin önüm öndürmäge gönükdiriler. Hususan-da, gurluşygy alnyp barylýan Daşkent – Samarkant awtobany üçin ýol gorag päsgelçilikleri, ýol belgileri, yşyklandyryş diregleri we beýleki degişli önümler öndüriler.
Habarda bellenilişi ýaly, taslamanyň durmuşa geçirilmegi Türkmenistan bilen Özbegistanyň arasyndaky ykdysady hyzmatdaşlygy has-da berkitmäge, täze iş orunlaryny döretmäge, häzirki zaman tehnologiýalaryny ornaşdyrmaga hem-de sebitiň ulag infrastrukturasynyň ösüşine möhüm goşant goşmaga mümkinçilik berer.
Maý aýynyň ahyrynda “Aýdyň Gijeler” Eswatini patyşalygynda hem önümçilik taslamasyny durmuşa geçirmek boýunça degişli ylalaşyklary baglaşyp, kärhananyň işi üçin 4 gektar ýer böleginiň bölünip berlendigini habar beripdi.
