Türkmenistanyň Prezidenti Serdar Berdimuhamedow anna güni geçirilen Ministrler Kabinetiniň giňişleýin mejlisinde Mary, Lebap, Balkan welaýatlarynyň häkimlerini wezipeden boşatdy we wezipä belledi. Bu barada Türkmenistanyň resmi metbugaty habar berdi.
Türkmenistanyň Prezidenti Lebap welaýatynyň häkimi, Suw hojalygy baradaky döwlet komitetiniň başlygy Durdy Meýmanowiç Genjiýewi welaýatyň häkimi wezipesinden boşatdy. Bu wezipä Hojamyrat Aşyrmyradow bellenilip, ol Balkan welaýatynyň häkimi wezipesinden boşadyldy.
Röwşen Welmyradowiç Jumaýew Balkan welaýatynyň häkimi wezipesine bellenilip, ol Ahal welaýatynyň Ak bugdaý etrabynyň häkimi wezipesinden boşadyldy.
Türkmenistanyň döwlet Baştutany Döwranberdi Orazberdiýewiç Annaberdiýewi, başga işe geçmegi sebäpli, Mary welaýatynyň häkimi wezipesinden boşatdy. Oba hojalyk ministrliginiň Ylmy-barlag ekerançylyk institutynyň direktory wezipesinde işleýän Batyr Durdygylyjowiç Orazgylyjow Mary welaýatynyň häkimi wezipesine bellenildi.
Ministrler Kabinetiniň giňişleýin mejlisinde Türkmenistanyň Prezidenti oba hojalyk pudagynyň ýolbaşçylaryna, welaýatlaryň, Aşgabat, Arkadag şäherleriniň häkimlerine “Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyny”, Oba milli maksatnamasyny üstünlikli durmuşa geçirmegiň, welaýatlarda we şäherlerde ýaşaýyş jaýlarynyň, hassahanalaryň, beýleki durmuş maksatly binalaryň gurluşygyna berk gözegçilik etmegiň, şäherleriň binagärlik-şähergurluşyk keşbini mundan beýläk-de abadanlaşdyrmagyň möhümdigini belläp, degisli tabşyryklary berdi.
