Türkmenistanda keramika önümlerini öndürýän “Eziz doganlar keramika” hojalyk jemgyýeti Gruziýanyň bazaryna önümlerini eksport etmegi meýilleşdirýär. Bu barada “Rysgal” gazeti duşenbe güni habar berdi.
Kärhana türkmen-gruzin işewürlik maslahatyna hem gatnaşyp, özüniň keramogranit, keramiki plitalar we sanfaýans önümleri bilen tanyşdyrdy. Maslahatyň dowamynda kärhananyň wekilleri Gruziýanyň işewür toparlary bilen duşuşyklary geçirdi. “Eziz doganlar keramika” hojalyk jemgyýetiniň taslama müdiri Gadam Hoşwagtowyň bellemegine görä, Gruziýada kärhananyň keramogranit hem-de sanfaýans önümlerine uly isleg bildirilýär.
Kärhanada döwrebap önümçilik toplumynda keramogranit, keramiki plitalar, sanfaýans önümleri hem-de beýleki keramika önümleri öndürilýär. Maslahatda hem gözden geçirilişiň myhmanlary kärhananyň bu ýokary hilli harytlarynyň gruzin bazarynyň bezegi bolup biljekdigini tassyklady.
“Eziz doganlar keramika” hojalyk jemgyýeti 2025-nji ýylda Türkmenistanyň Prezidentiniň gatnaşmagynda dabaraly ýagdaýda açylyp ulanmaga berildi. Kärhana Türkmenistanda senagat önümleriniň önümçiligini ösdürýän hususy kärhanalaryň biri bolup, öndürýän önümleriniň görnüşlerini giňeltmek we halkara bazarlaryna çykarmak boýunça degişli işleri alyp barýar.
