Türkmenistanda birža söwdalaryna gatnaşmagy meýilleşdirýän daşary ýurt kompaniýalary hasaba alyş işlerinden geçmeli we olaryň hukuk derejesini tassyklaýan resminamalary tabşyrmaly. Köp kompaniýalar üçin bu Türkmenistanyň Döwlet haryt-çig mal biržasyna (TDHÇMB) çykmakda ilkinji amaly ädimleriň biridir.
Resminamalary kanunlaşdyrmak daşary ýurt kompaniýasy baradaky maglumatlary barlamak we hödürlenen resminamalaryň hakykylygyny tassyklamak üçin zerurdyr. TDHÇMB-niň Maliýe gözegçiligi bölümi kompaniýanyň beren maglumatlaryny onuň işiniň we amallarynyň görnüşlerini göz öňünde tutup barlaýar. Şeýle barlag nädogry maglumatlary ýüze çykarmaga we birža gatnaşyjylary bilen işleriň aç-açanlygyny üpjün etmäge ýardam edýär.
Hödürlenmeli resminamalara bildirilýän talaplar biržada gatnaşyjylar baradaky maglumatlaryň dogrulygyny anyklamaga we daşary ýurt kompaniýalary bilen işleşmekde aç-açanlygy üpjün etmäge mümkinçilik berýär.
TDHÇMB-niň Maliýe gözegçiligi bölüminde daşary ýurt ýuridik şahsyny hasaba almak üçin şu resminamalar zerurdyr:
- Türkmenistanyň Döwlet haryt-çig mal biržasynyň başlygynyň adyna ýüzlenme haty;
- kompaniýanyň notarius ýa-da konsullyk gullugy tarapyndan tassyklanan esaslandyryjy resminamalarynyň nusgalary. Kompaniýanyň notarius ýa-da konsullyk gullugy tarapyndan tassyklanan tertipnamasynyň we bar bolsa, tertipnama goşundysynyň nusgasy;
- notarius ýa-da konsullyk gullugy tarapyndan tassyklanan 2026-njy ýyldaky täze reýestrden göçürme;
- ýuridik şahslar üçin doldurylan sowalnama.
Hususy telekeçiler üçin aýratyn sowalnama we degişli resminamalar toplumy göz öňünde tutulandyr. TDHÇMB-niň internet sahypasynda ýuridik şahslar we hususy telekeçiler üçin ýüzlenme hatynyň hem-de sowalnamanyň aýratyn görnüşleri ýerleşdirilendir. Resminamalar taýýarlanylanda arza berijiniň hukuk derejesine laýyk gelýän görnüşini saýlamak möhümdir.
TDHÇMB-ä tabşyrylýan ähli resminamalar Türkmenistanyň döwlet diline terjime edilmeli we terjime býurosy tarapyndan tassyklanmalydyr.
Resminamalary kanunlaşdyrmak işini Türkmenistanyň Döwlet haryt-çig mal biržasynyň internet sahypasyndaky şahsy otag arkaly onlaýn görnüşde geçmek bolýar. Şahsy otagda zerur maglumatlary girizmek, resminamalary ýüklemek, şeýle hem ýüzlenme hatlarynyň blankalaryny we nusgalaryny ýükläp almak we zerur bolan halatynda resminamalar toplumyny doldurmak mümkin.
Onlaýn görnüşde resminamalary tabşyrmagyň artykmaçlyklarynyň biri olary öňünden barlatmaga mümkinçilik bermegidir. Resminamalary gutarnykly taýýarlap, tabşyrmazdan öň, olary bellenen sanawa laýyklykda şahsy hasaba ýüklemek bolýar. Biržanyň Maliýe gözegçiligi bölüminiň hünärmenleri resminamalary öňünden gözden geçirip, ýüze çykarylan näsazlyklar ýa-da ýalňyşlyklar barada habar berip bilerler. Bu zerur düzedişleri öňünden girizmäge we resminamalary täzeden taýýarlamak zerurlygynyň öňüni almaga mümkinçilik berýär.
Resminamalary kanunlaşdyrmak işini ýüzbe-ýüz görnüşde hem geçirmek bolýar. Munuň üçin daşary ýurt kompaniýasy Türkmenistanda öz wekiline ynanç hatyny berip we ynanylan adamyň pasportynyň nusgasyny tabşyryp biler. Şol wekil resminamalary biržanyň binasynda ýerleşýän degişli bölüme tabşyryp biler. Ýüzbe-ýüz tabşyrylanda hem resminamalary gutarnykly resmileşdirmezden öň hünärmenlere barlatmak üçin hödürlemek mümkin.
Bu hyzmat üçin töleg we nyrhlar baradaky maglumat Türkmenistanyň Döwlet haryt-çig mal biržasynyň internet sahypasynda ýerleşdirilendir.
