Türkmenistanyň Senagatçylar we telekeçiler birleşmesiniň agzasy bolan “Ýedi ýer” hojalyk jemgyýeti Arkadag şäheriniň gurluşygynyň ikinji tapgyrynda täze ýollaryň we ulag infrastrukturasynyň gurluşygyny alyp barýar. Bu barada kärhananyň deklaranty Aýlar Pirmedowa Aşgabatda 17-19-njy sentýabr aralygynda geçirilen Türkmenistanyň Garaşsyzlygynyň şanly 35 ýyllygy mynasybetli ýurduň ykdysady üstünlikleriniň sergisiniň dowamynda “Business Turkmenistan” internet neşirine gürrüň berdi.
“Ýedi ýer” hojalyk jemgyýeti 2010-njy ýyldan bäri ýol-ulag we infrastruktura desgalarynyň gurluşygy boýunça iş alyp barýar. Kärhana Arkadag şäheriniň täze ýol ulgamlaryny gurmak bilen bir hatarda, ozal gurlan ýollaryň durkuny täzelemek işlerini, duralgalaryň we çatryklardaky aýlawlaryň gurluşygy ýaly işleri amala aşyrýar.
Kärhana 2025-nji ýylda Gökdepe we Keýmir kör şaýollarynyň çatrygynda gurlan köpriniň hem gurluşygyny amala aşyrdy. Bu desga “Ýedi ýer” hojalyk jemgyýetiniň ýol-ulag infrastrukturasyny ösdürmek boýunça amala aşyran iri göwrümli taslamalarynyň biridir.
Mundan başga-da “Ýedi ýer” hojalyk jemgyýeti Balkan welaýat häkimliginiň buýurmasy esasynda Gyzylarbat şäherinde agyz suwuny arassalaýjy täze desganyň gurluşygyny hem ýerine ýetirdi.
“Ýedi ýer” hojalyk jemgyýeti gurluşyk, ýol-ulag we inženerçilik desgalaryny gurmak, şeýle hem abadanlaşdyrmak boýunça döwlet we hususy taslamalary alyp barýar.
