Türkmenistanyň we Amerikanyň Birleşen Ştatlarynyň arasynda her ýyl geçirilýän syýasy geňeşmeleriň nobatdaky tapgyry sişenbe güni sanly ulgam arkaly başlandy.
Türkmenistanyň wekiliýetine Daşary işler ministri Raşid Meredow ABŞ-nyň wekiliýetine bolsa, Döwlet sekretarynyň Günorta we Merkezi Aziýa işleri boýunça kömekçisi Donald Lu ýolbaşçylyk etdi. Şeýle-de duşuşyga iki ýurduň ugurdaş ministrlikleriniň we pudak edaralarynyň ýolbaşçylary hem-de wekilleri gatnaşdylar.
Syýasy geňeşmeleriň barşynda ikinji nobatda ikitaraplaýyn özara hereketleriň derwaýys ugurlaryna seredildi. Bu barada Türkmenistanyň DIM-niň metbugat gullugy habar berdi.
Taraplar Türkmenistanyň we ABŞ-nyň häzirki zaman halkara syýasatynyň möhüm meseleleriniň ençemesi babatynda umumy ýörelgelere we çemeleşmelere eýerýändiklerini nygtadylar. Ilkinji nobatda bu dünýäde we sebitde durnuklylygyň hem-de howpsuzlygyň pugtalandyrylmagy bolup durýandygy bellenildi. Ýurtlaryň ikisi hem iri halkara gurmalarynyň, ilkinji nobatda Birleşen Milletler Guramasynyň çäklerinde ysnyşykly hyzmatdaşlyk saklaýarlar.
Taraplar şonuň ýaly-da durnukly ösüş maksatlarynyň ilerledilmegi, global wehimlere – terrorçylyga, ekstremizme, neşe serişdeleriniň bikanun dolanşygyna garşy göreşmek ýaly derwaýys meseleler babatyndaky çemeleşmeleriniň umumylygyny tassykladylar.
Geňeşmeleriň çäklerinde adam ölçegleriniň meseleleri hem ara alnyp maslahatlaşyldy. Hususan-da, adam hukuklarynyň goragy we kepillendirilmegi ulgamynda Türkmenistan tarapyndan alnyp barylýan işlere syn berildi. Şu nukdaýnazardan, bu ugurda Türkmenistanyň we ABŞ-nyň arasyndaky gatnaşyklaryň dowam edilmegi babatynda taýýarlyk bildirildi.
Iki ýurduň arasyndaky syýasy geňeşmeler çarşenbe güni hem dowam eder.
