Türkmenistanyň Daşary işler ministri Raşid Meredow ýekşenbe güni Türki döwletleriň guramasynyň (TDG) Baş sekretary Bagdad Amreýewi kabul etdi. Bu barada Türkmenistanyň DIM-niň metbugat gullugy habar berdi.
B.Amreýew Aşgabada TDG-niň synçylar toparynyň ýolbaşçylygynda Türkmenistanyň Prezidentiniň saýlawlaryna gözegçilik etmek maksady bilen geldi.
Bellenilmegine görä, Türkmenistan Türki döwletleriň guramasy bilen gatnaşyklaryň ösdürilmegini özüniň sebitleýin we ählumumy hereketlere gatnaşygynyň umumy ugruny nazarda tutmak arkaly ileri tutýar.
Bu ugurda Türkmenistanyň Türki döwletleriň guramasynyň ýanyndaky halkara düzümleriň ençemesi, hususan hem Ýaşulylar Geňeşi, Türki döwletleriň guramasynyň Parlament assambleýasy hem-de Türki söwda-senagat edarasy bilen hyzmatdaşlygynyň ilerledilmegine gyzyklanma bildirýändigi bellenildi.
Türki döwletleriň guramasynyň Baş sekretary öz nobatynda saýlawlara gatnaşmaga çagyrandygy üçin türkmen tarapyna minnetdarlygyny beýan edip, Türkmenistanda geçirilen Prezident saýlawlaryna ýokary baha berdi hem-de saýlawlaryň açyk, aýdyňlyk we demokratik ýagdaýda geçirilendigini nygtady.
Şeýle-de B.Amreýew Türkmenistanyň onuň wekilçilik edýän halkara düzüminiň işine işjeň gatnaşýandygynyň ähmiýetini nygtamak bilen, häzirki wagtda Türki döwletleriň guramasy tarapyndan durmuşa geçirilýän derwaýys taslamalara hem-de maksatnamalara üns çekdi.
Türkmenistan geçen ýylyň noýabr aýynda Türki döwletleriň guramasyna synçy döwlet hökmünde goşuldy.
