Türkmenistanyň Daşary işler ministriniň orunbasary Berdiniýaz Mätiýewiň ýolbaşçylygynda Türkmenistanyň wekiliýeti Birleşen Arap Emirlikleriniň (BAE) Daşary işler we halkara hyzmatdaşlyk ministrliginde Döwlet ministri Ahmed Ali Al Saýeg bilen Abu-Dabi şäherinde geçirilen duşuşygynyň dowamynda Türkmenistanyň Prezidenti Serdar Berdimuhamedowyň BAE meýilleşdirilýän resmi saparyny gurnamak meseleleri ara alnyp maslahatlaşyldy.
Döwlet Baştutanymyz BAE-niň Prezidenti Şeýh Mohammed Bin Zaýed Al Nahaýýan tarapyndan iýul aýynda orta gündogar ýurdyna sapara çagyryldy.
Türkmenistanyň wekiliýetiniň BAE-de iş sapary 2022-nji ýylyň 12-16-njy sentýabry aralygynda dowam eder. Bu barada DIM-nyň resmi metbugaty çarşenbe güni habar berdi.
Şeýle hem, 12-14-nji sentýabr aralygynda türkmen wekiliýeti BAE-niň Energetika we infrastruktura ministri Suhaýl Al Mazrui, Abu-Dabi portunyň Baş ýerine ýetiriji direktory we dolandyryjysy Saif Muhammet Juma Al Şamisi, Abu-Dabiniň Ösüş gaznasynyň Baş direktory Saif Al Suwaidi, “Masdar” kompaniýasynyň Baş ýerine ýetiriji direktory Muhammet Jamil Al Ramahi bilen ikitaraplaýyn duşuşyklar geçirdi.
Duşuşyklaryň dowmynda taraplar 2022-nji ýylda Abu-Dabide meýilleşdirilýän Türkmenistan bilen BAE-niň arasynda hyzmatdaşlyk boýunça Bilelikdäki komitetiň nobatdaky mejlisini taýýarlamak we geçirmek boýunça meseleleri ara alyp maslahatlaşdylar.
Şeýle hem, iki ýurduň arasynda söwda-ykdysady gatnaşyklaryň pugtalandyrylmagy bilen bagly meselelere içgin garaldy. Taraplar döwlet we hususy düzümleriň arasyndaky hyzmatdaşlygy giňeldilmegine, maýa goýum ýagdaýynyň kämilleşdirilmegine gyzyklanma bildirýändiklerini beýan etdiler.
Taraplar Türkmenistan bilen BAE-niň ulag ulgamyndaky mümkinçilikleriniň ösdürilmegi boýunça pikir alşyldylar we ikitaraplaýyn söwda-ykdysady gatnaşyklaryny ösdürmek üçin deňiz, howa, demirýol ulaglarynyň we port infrastrukturasynyň mümkinçiliklerini garadylar.
Türkmenistanyň wekiliýeti saparyň dowamynda BAE-niň ministrliklerinde we pudak edaralarynda birnäçe goşmaça duşuşyklary geçirmegi meýilleşdirýär.
