Türkmenistanyň Statistika baradaky döwlet komiteti türkmen raýatlaryny ýurtda geçiriljek ilatyň we ýaşaýyş jaý gorunyň uçdantutma ýazuwyna işjeň gatnaşmaga çagyrýar.
Statistika komiteti ilat ýazuwynyň wagty we onuň ýurdy mundan beýläk-de durmuş-ykdysady taýdan ösdürmekdäki ähmiýeti barada raýatlara “Altyn Asyr” öýjükli aragatnaşyk kompaniýasy arkaly maglumat berdi.
Maglumata görä, “Ilat ýazuwy-2022: Jebislik, Bagtyýarlyk, Röwşen geljek!” şygary astynda guralýan uçdantutma ýazuwy şu ýylyň dekabr aýynyň 17-27-si aralygynda geçiriler.
Şu ýyl gurnaljak ilat ýazuwy ilkinji gezek sanly tehnologiýalary ulanmak arkaly geçiriler. Olaryň ulanylmagy ýurtda demografiki we durmuş-ykdysady görkezijiler barada iň takyk maglumatlary ýygnamaga ýardam bermegine garaşylýar.
