Bursa şäherinde anna güni geçirilen Türki medeniýetiniň halkara guramasynyň (TÜRKSOÝ) Medeniýet ministrleriniň Hemişelik Geňeşiniň 39-njy duşuşygynda Änew şäheri 2024-nji ýyl üçin türki dünýäsiniň paýtagty diýlip yglan edildi. Bu barada TÜRKSOÝ web sahypasynda anna güni çap edilen duşuşygyň jemleýji Jarnamasynda aýdylýar.
Hemişelik Geňeş Türkmenistanyň Medeniýet ministrliginiň tekliplerine laýyklykda türki dünýäsiniň beýik şahyry we akyldary Magtymguly Pyragynyň doglan gününiň 300 ýyllygy mynasybetli 2024-nji ýyly Magtymguly Pyragynyň ýyly diýip yglan etmek kararyna geldi.
Şeýle hem duşuşygyň dowamynda dünýäde türki dünýäsiniň medeni mirasyny wagyz etmek we olaryň syýahatçylyk babatda mümkinçiligine goşant goşmak maksady bilen TÜRKSOY-yň ýolbaşçylygynda türki dünýäsiniň maddy we maddy däl medeni mirasyny sertifikatlaşdyrmak üçin maksatnama düzmek, şeýle hem bu maksatnamany ýurtlara hödürläp, ony ösdürmek üçin bilelikdäki çäreleri geçirmek kararyna gelindi.
TÜRKSOY-yň kabul eden jemleýji Jarnamasyna guramanyň agza ýurtlarynyň hökümet işgärleri, şol sanda Türkmenistanyň Medeniýet ministri Atageldi Şamyradow gol çekdi.
