Türkmenistan-BAE işewürler geňeşiniň döredilmegi meýilleşdirilýär

Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredow Ministrler Kabinetiniň anna güni sanly ulgam arkaly geçirilen mejlisiniň dowamynda Türkmenistanyň Prezidenti Serdar Berdimuhamedowa Türkmenistan bilen BAE-niň arasynda bilelikdäki işewürler geňeşini döretmegi teklip etdi.

Türkmenistanyň Daşary işler ministri Türkmenistanyň Prezidentiniň 21-22-nji noýabr aralygynda Birleşen Arap Emirliklerine (BAE) amala aşyran resmi saparynyň netijeleri boýunça hasabat berdi. Bu barada Türkmenistanyň resmi metbugaty habar berdi.

Raşid Meredow Türkmenistanyň Söwda-senagat edarasynyň we BAE-niň Söwda-senagat edaralary federasiýasynyň arasynda 2023-2024-nji ýyllar üçin hyzmatdaşlyk boýunça iş meýilnamasyny taýýarlamagy hem-de bilelikdäki işewürler geňeşini döretmegi we onuň birinji mejlisini geljek ýylda geçirmegi teklip etdi.

Şeýle hem wise-premýer ýakyn wagtda BAE-niň senagat we öňdebaryjy tehnologiýalar boýunça ministriniň ýolbaşçylygyndaky wekiliýetiň Türkmenistana saparynyň meýilleşdirilýändigini habar berdi.

Mundan başga-da, mejlisiň dowamynda syýahatçylyk ulgamynda gatnaşyklary ýola goýmagyň mümkinçiliginden ugur alnyp, ýurdumyzyň Medeniýet ministrliginiň hem-de Senagatçylar we telekeçiler birleşmesiniň wekilleriniň BAE-niň ugurdaş düzümleriniň wekilleri bilen geňeşmeleriň we maslahatlaşmalaryň guralmagy teklip edildi.

Türkmenistanyň Prezidenti Serdar Berdimuhamedow BAE-ne resmi saparynyň netijeleri boýunça Hökümetara we pudagara derejelerinde 13 resminama, şeýle-de telekeçilik düzümleriniň ugry boýunça 8 resminama gol çekildi.

Ylalaşyklary iş ýüzünde durmuşa geçirmek maksady bilen, 2023-nji ýylyň birinji ýarymynda Abu-Dabide Türkmenistan bilen BAE-niň arasynda Hyzmatdaşlyk boýunça bilelikdäki komitetiň nobatdaky mejlisiniň geçirilmegine, şeýle-de türkmen-emirlikler hyzmatdaşlygyny mundan beýläk-de giňeltmäge gönükdirilen “Ýol kartasynyň” taýýarlanmagyna garaşylýar.