Täjigistanyň Prezidenti Emomali Rahmon Türkmenistanyň Prezidenti Serdar Berdimuhamedow bilen şenbe güni telefon arkaly geçirilen söhbetdeşlikde Türkmenistanyň Prezidentiniň enesiniň hem-de türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň mähriban käbesiniň – Ogulabat Berdimuhamedowanyň aradan çykmagy zerarly çuňňur gynanjyny we medet beriji sözlerini beýan etdi.
Söhbetdeşligiň dowamynda Täjigistanyň Prezidenti Emomali Rahmon Ogulabat ejäniň durmuş ýolunyň Watana, mähriban ojaga wepaly maşgalanyň sütüni we mertebesi hökmünde ýaş nesiller üçin nusga bolup durýandygyny belläp, Türkmenistanyň Prezidentine hem-de türkmen halkynyň Milli Liderine we olaryň ýakynlaryna şu kyn pursatda durnuklylygy arzuw etdi. Bu barada Türkmenistanyň resmi metbugaty habar berdi.
Türkmenistanyň Prezidenti Serdar Berdimuhamedow gynanç bildirendigi üçin, Täjigistanyň Prezidentine minnetdarlyk bildirip, agyr ýitgi zerarly şu kyn günlerde ýakyn dost tarapyndan berilýän uly goldawyň möhümdigini belledi.
Söhbetdeşligiň ahyrynda Türkmenistanyň Baştutany gynanç bildiren sözleri üçin Täjigistanyň Prezidenti Emomali Rahmona ýene-de bir gezek minnetdarlyk bildirdi hem-de berk jan saglyk, abadançylyk we uly üstünlikleri, täjik halkyna bolsa, parahatçylyk we gülläp ösüş arzuw etdi.
Şeýle hem Türkmenistanyň Prezidenti Serdar Berdimuhamedowa Özbegistanyň, BAE-niň Döwlet Baştutanlary, BAE-niň wise-prezidenti, Premýer-ministri, Dubaýyň häkimi we BAE-niň wise-prezidenti, wise-premýeri, Prezidentiň iş dolandyryş ministri gynanç hatyny iberdiler.
Mundan başga-da, türkmen halkynyň Milli Lideri, Halk Maslahatynyň Başlygy Gurbanguly Berdimuhamedowa mähriban käbesiniň aradan çykmagy zerarly Özbegistanyň, Täjigistanyň, Russiýanyň, Gazagystanyň, Tatarystanyň Döwlet Baştutanlary, Tatarystanyň Döwlet geňeşçisi, Gazagystanyň ilkinji Prezidenti, BAE-niň wise-prezidenti, Premýer-ministri, Dubaýyň häkimi we BAE-niň wise-prezidenti, wise-premýeri, Prezidentiň iş dolandyryş ministri gynanç bildirdiler.
Türkmenistanyň Prezidenti Serdar Berdimuhamedowyň enesi, türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň ejesi Ogulabat Berdimuhamedowa 86 ýaşynyň içinde aradan çykdy.
