Türkmenistan Ýewraziýa Ykdysady Birleşmesiniň (ÝYB) agza ýurtlarynyň “Ýewraziýa agroekspresi” atly taslamasyna goşuldy. Bu barada Ýewraziýa Ykdysady Komissiýasynyň (ÝYK) Söwda ministri Andreý Slepnewiň aýdanlaryna salgylanyp, “TASS” agentligi çarşenbe güni habar berdi.
Andreý Slepnewiň aýtmagyna görä, bilelikdäki taslama Demirgazyk-Günorta halkara ulag geçelgesi boýunça Türkmenistana, Eýrana, Birleşen Arap Emirliklerine we Hindistana amala aşyrylýan ýük daşamalaryny öz içine alýar.
Habarda bellenilişi ýaly, taslamanyň çäreleriniň täzelenen meýilnamasy Belarus Respublikasy, Gazagystan we Gyrgyz Respublikasy bilen birleşip, Türkmenistandan geçýän Demirgazyk-Günorta halkara ulag geçelgesiniň gündogar şahasy boýunça her aýdaky synag iberilişi öz içine alýar.
Mundan başga-da, Hytaýa göni demirýol gatnawlarynyň mukdary artýar we Özbegistanda bolup biljek logistika merkezleri we nyrh şertleri işlenip düzülýär.
Şeýle hem geçen ýyl bilelikdäki taslamanyň çäginde oba hojalyk önümleri bilen üpjünçiligiň mukdary 500 müň tonnadan geçdi.
“Ýewraziýa agroekspresi” bu ÝYB-niň agza ýurtlarynyň (Ermenistan, Belarus Respublikasy, Gazagystan, Gyrgyz Respublikasy, Russiýa) oba hojalygynyň eksport harytlaryny Hytaýa, Özbegistana, Wýetnama we Günorta-Gündogaryň hem-de Merkezi Aziýanyň beýleki ýurtlaryna tiz demirýol we multimodal konteýner daşamalaryny amala aşyrmak üçin niýetlenen taslamadyr.
25382-90x604.jpg)
