Türkmenistanyň Prezidenti Serdar Berdimuhamedowyň, Täjigistanyň Prezidenti Emomali Rahmonyň we Özbegistanyň Prezidenti Şawkat Mirziýoýewiň gatnaşmaklarynda anna güni Aşgabatda geçirilen sammitde suw serişdeleriniň netijeli dolandyrylmagyna, goralmagyna we rejeli peýdalanylmagyna, gidrotehniki desgalaryň howpsuzlygynyň üpjün edilmegine we ekologiýa meselelerine aýratyn üns berildi.
Sammitiň dowamynda Türkmenistanyň Prezidenti durnukly suw üpjünçiligini sebitiň ýurtlary üçin derwaýys meseleleriň hatarynda görkezip, suw serişdelerini rejeli dolandyrmagyň gurallaryny kemala getirmek, bu ugurda netijeli çäreleri görmek meselesiniň wajypdygyny nygtady. Bu barada Türkmenistanyň resmi metbugaty habar berdi.
“Gürrüň, hususan-da, suw tygşytlaýjy tehnologiýalary ornaşdyrmak, degişli suw hojalyk desgalaryny döwrebaplaşdyrmak, beýleki degişli çäreler hem-de biziň ýurtlarymyzyň suwa bolan isleglerini doly derejede we özara bähbitleri nazara almak arkaly üpjün etmäge mümkinçilik berjek tehnologik çözgütler barada barýar. Suw turbageçiriji infrastrukturasyny döretmegiň mümkinçiliklerine garamak şeýle çözgütleriň biri bolup bilerdi” diýip, Türkmenistanyň Döwlet Baştutany öz çykyşynda aýtdy.
Özbegistanyň Prezidenti Şawkat Mirziýoýew öz gezeginde öňdebaryjy suw tygşytlaýjy tehnologiýalary ornaşdyrmak, suw serişdelerini dolandyrmak işini sanlylaşdyrmak, bu meselelerde Araly halas etmegiň halkara gaznasynyň kuwwatyndan peýdalanmak, hyzmatdaşlyk guramalarynyň we düzümleriniň ugry boýunça gatnaşyklar babatda teklipleri beýan etdi.
Üçtaraplaýyn sammitiň barşynda taraplar Amyderýanyň suw serişdelerini rejeli peýdalanmagyň ileri tutulýan ähmiýetini nygtadylar we howanyň üýtgemegi we Amyderýanyň suw serişdelerine talaplaryň artmagy bilen bagly netijeli çäreleri üpjün etmek maksady bilen, köptaraply hyzmatdaşlygyň usullaryny mundan beýläk-de kämilleşdirmegiň zerurdygyny bellediler.
Mundan başga-da Aşgabatda geçirilen ilkinji üçtaraplaýyn sammitde energetika ulgamynda hyzmatdaşlygyň giňeldilmegine, ulag we logistika ulgamynda hyzmatdaşlygyň pugtalandyrylmagyna, üstaşyr ulag ugurlarynyň giňeldilmegine aýratyn üns çekildi.
