Häzirki wagtda Ýewraziýa Ykdysady Komissiýasy (ÝYK) Türkmenistanyň we Eýranyň üstünden demirýol arkaly haryt daşamak meselelerini ara alyp maslahatlaşmak üçin Demirgazyk - Günorta halkara ulag geçelgesiniň taslamasyna gatnaşýan ýurtlar, şeýle hem bu taslama gyzyklanma bildirýän taraplar bilen iş alyp barýar.
Ýewraziýa Ykdysady Komissiýasynyň (ÝYK) Energetika we infrastruktura ministri Arzybek Kožoşew bu barada “Abu-Dhabi Ports” kompaniýalar toparynyň baş direktory Mohammed Juma Al Şamisi bilen şu ýylyň 2-nji oktýabrynda Abu-Dabi şäherinde geçirilen duşuşykda mälim etdi. Bu barada Ýewraziýa Ykdysady Komissiýasynyň metbugat gullugy habar berdi.
ÝYK-nyň Energetika we infrastruktura ministri Demirgazyk — Günorta halkara ulag geçelgesiniň meýilleşdirilen geçirijilik ukybynyň 41-45 million tonna çenli artyp biljekdigini aýtdy.
Gazagystanyň Söwda we integrasiýa ministrliginiň metbugat gullugy şu ýylyň awgust aýynda Gazagystanyň eksport üçin niýetlenilen azyk önümlerini Aýlag ýurtlarynyň, Ýakyn Gündogaryň, Pakistanyň, Hindistanyň we Gündogar Afrikanyň bazarlaryna daşamak üçin iň gysga we göni ugry ösdürmek boýunça iş alyp barýandygyny habar berdi.
