Türkmenistan bilen Hytaý energetika ulgamynda hyzmatdaşlygy çuňlaşdyrmaga gönükdirilen Ähtanama gol çekdiler. Bu barada “Neýtralnyý Türkmenistan” gazetiniň sişenbe günündäki sanynda habar berilýär.
Bu resminama duşenbe güni Aşgabatda geçirilen Hyzmatdaşlyk boýunça türkmen-hytaý hökümetara komitetiniň energetika boýunça kiçi komitetiniň 9-njy mejlisiniň çäklerinde baglaşyldy.
Ähtnama laýyklykda, taraplar iki ýurduň bilermenleri tarapyndan işlenip taýarlanylan bilelikdäki taslamalary giňeltmäge taýýardyklaryny beýan etdiler.
Hytaý wekiliýetine HHR-iň Energetika müdirliginiň başlygy Çžan Sinhua başlyklyk etdi. Gepleşikleriň barşynda Türkmenistan tebigy gazyň Hytaýa iberilýän möçberlerini artdyrmaga taýýardygyny mälim etdi.
Türkmen tarapy energetika pudagyny döwrebaplaşdyrmak, şol sanda innowasion tehnologiýalary ornaşdyrmak we öňdebaryjy halkara tejribeleri ornaşdyrmak boýunça meýilnamalary bilen tanyşdyrdy.
Taraplar işewürleriň bilelikdäki tagallalary arkaly hyzmatdaşlygy mundan beýläk-de giňeltmegiň we ösdürmegiň iki ýurt üçin-de ileri tutulýan ugurdygyny bellediler.
Ozal habar berlişi ýaly, Ýagşygeldi Kakaýew adyndaky Halkara nebit we gaz uniwersiteti bilen Hytaýyň dört sany edarasy Türkmenistanda Lu Banýanyň ussahanasyny döretmek boýunça özara düşünişmek hakynda bäştaraplaýyn Ähtnama gol çekdiler.
