Daşoguz welaýatynyň Boldumsaz etrabynyň Gökýaýla geňeşliginiň Ak Altyn obasynda orta basyşly uzynlygy iki kilometrden gowrak bolan täze gaz geçirijisiniň gurluşygy tamamlandy. Bu barada Türkmenistanyň resmi metbugaty anna güni habar berdi.
Bu iri başlangyçlaryň çäklerinde dürli uzynlykdaky şeýle gaz geçirijiler Bereketli geňeşliginiň Uşak oba obasynda, Gubadag şäheriniň Galkynyş köçesinde hem-de “Boldumsazetrapgaz” müdirliginiň Gubadag etrap bölümine degişli beýleki ilatly ýerlerde guruldy.
Ýerlerde içerki paýlaýyş düzümleri hem oturdyldy. Şu ýylyň dowamynda diňe şu zolakda gaz üpjünçilik geçirijileriň 6,5 kilometri we içerki düzümleriň 2,5 kilometri çekildi. Munuň özi täze gaz geçirijileri gurmak boýunça ýyllyk meýilnamany ýerine ýetirmäge mümkinçilik berdi.
Işleri ýerine ýetirmekde dürli diametrli, ýokary geçirijilik ukybyna eýe bolan we daşarky täsirlere çydamly, ýokary hilli turbalar ulanyldy. Bu serişdeler ilatyň tebigy gaz bilen bökdençsiz üpjün edilmegini kepillendirýär.
Täze gaz geçirijiler senagat desgalaryna, şeýle hem gurluşyk meýançalaryna çekilýär. Şol bir wagtyň özünde sebitde gaz paýlaýjy we dolandyryjy enjamlar döwrebaplaşdyrylyp, hereket edýän düzümlere hyzmat edilýär. Munuň özi olaryň howpsuz we durnukly ulanylmagyna ýardam edýär.
