OGT 2025: Türkmenistan sebitleýin energetika bazarynda ornuny pugtalandyrýar

Aşgabatda geçirilen “Türkmenistanyň Nebiti we Gazy – OGT 2025” halkara maslahaty we sergisi dünýäniň 70 ýurdundan 1400-den gowrak wekiliň gatnaşmagynda giň gerim bilen geçirildi. Bu çäre Türkmenistanyň sebit energetika bazarynda ynamdar we geljegi uly hyzmatdaş hökmünde abraýyny ýene-de bir gezek tassyklady.

OGT 2025 halkara maslahaty we sergisi Türkmenistanyň “Türkmennebit” we“Türkmengaz” döwlet konsernleri hem-de  “Türkmengeologiýa” döwlet korporasiýasy tarapyndan “Türkmen Energiýa Forum” bilen hyzmatdaşlykda guraldy. Üç günüň dowamynda 100-den gowrak kompaniýa (öňki ýyldakydan 45% köp) nebitgaz hem-de arassa energetika ugurlaryndaky täze tehnologiýalaryny we innowasion çözgütlerini hödürlemek mümkinçiligini aldy.

Maslahatyň açylyşyna pudagyň öňdebaryjy wekilleri Seýid Mohammed Al Taýer (DEWA / ENOC), Daniel Ýergin (S&P Global), Andrea Steger (IGU), Abdulwahit Fidan (BOTAŞ, Türkiýe) we Rowşan Najaf (SOCAR, Azerbaýjan) gatnaşdylar.

Forumyň dowamynda “BusinessConnect AI” platformasy arkaly maýadarlar bilen ykdysady taslamalaryň wekilleriniň arasynda 300-den gowrak iş duşuşygy geçirildi. Bu duşuşyklar täze hyzmatdaşlyklaryň döremegine we söwda gatnaşyklarynyň giňelmegine ýardam berdi.

Forumyň gün tertibine TOPH gaz geçirijisiniň ösdürilmegi, Hazar deňziniň türkmen bölegindäki şelf bloklarynyň özleşdirilmegi, “Galkynyş” gaz käniniň giňeldilmegi, şeýle hem wodorod tehnologiýalaryny ornaşdyrmak we metan zyňyndylaryny azaltmak boýunça möhüm meseleler girizildi.

OGT 2025 forumynyň ösüşine halkara metbugat giň üns berdi — Euronews, bne IntelliNews we NewsBase ýaly habar serişdeleri bu çäre barada giňden habar berdiler. OGT-niň guramaçylyk komiteti eýýäm indiki ýylky OGT 2026 forumyna taýýarlyga girişdi. Indiki forumda esasy üns emeli aň, wodorod energetikasy we gaýtadan dikeldilýän energiýa çeşmeleri ýaly ugurlara gönükdiriler.