Türkmenistanda “Galkynyş” gaz käniniň özleşdirilmeginiň dördünji tapgyryna badalga berildi. “Galkynyş” gaz käninde täze guýulary burawlamak hem-de tebigy gazy gaýtadan işlemek üçin desganyň gurluşygyna başlamak dabarasy geçirildi. Bu barada “Neýtralnyý Turkmenistan” gazeti anna güni habar berdi.
Taslama ýylda goşmaça 10 milliard kub metr harytlyk gazy gaýtadan işlemäge mümkinçilik berýän desgalary döretmegi göz öňünde tutýar. Bu tapgyryň durmuşa geçirilmegi gazyň çykarylyş möçberlerini artdyrmaga we ýurduň, ilkinji nobatda, Hytaý ugrunda eksport mümkinçiliklerini artdyrmaga gönükdirilendir.
Habarda bellenilişi ýaly, bu başlangyjyň amala aşyrylmagy täze iş orunlarynyň döredilmegine, ýangyç-energetika toplumynyň mümkinçilikleriniň giňeldilmegine hem-de Türkmenistan bilen Hytaýyň arasynda gaz pudagyndaky hyzmatdaşlygyň pugtalandyrylmagyna ýardam berer.
Ozal Türkmenistanyň Prezidenti Serdar Berdimuhamedowyň gol çeken Kararyna laýyklykda “Türkmengaz” döwlet konserni Hytaýyň “CNPC Amudarya Petroleum Company Ltd.” kompaniýasy bilen şertnama baglaşdy.
“Galkynyş” gaz käni tebigy gaz gorlary boýunça dünýäde iň iri känleriň biri bolup durýar. Onuň tebigy baýlyklarynyň yzygiderli özleşdirilmegi “mawy ýangyjyň” eksportyny mundan beýläk-de artdyrmaga gönükdirilendir.
