Türkmenistanyň Daşary işler ministri Raşid Meredow Niderlandlar Patyşalygynyň Premýer-ministriniň daşary syýasat we goranmak meseleleri boýunça geňeşçisi Kristofer Ýonker bilen duşuşdy. Bu barada Türkmenistanyň Daşary işler ministrligi habar berdi.
Duşuşykda türkmen-niderland gatnaşyklaryna goşmaça itergi bermek, şol sanda syýasy gatnaşyklary işjeňleşdirmek we Türkmenistan bilen Ýewropa Bileleşiginiň arasyndaky hyzmatdaşlygyň çäklerinde dialogy giňeltmek meseleleri ara alnyp maslahatlaşyldy.
Taraplar häzirki zaman halkara we sebit meseleleri boýunça hem pikir alyşdylar. Türkmen tarapy Türkmenistanyň hemişelik Bitaraplyk hukuk ýagdaýyndan gelip çykýan çemeleşmelerini beýan edip, halkara meselelerini çözmekde öňüni alyş diplomatiýasynyň, syýasy dialogyň we parahatçylykly serişdeleriň aýratyn ähmiýetini nygtady.
Duşuşykda ykdysady hyzmatdaşlygyň mümkinçiliklerine aýratyn üns berildi. Niderland işewürleriniň Türkmenistanda durmuşa geçirilýän taslamalara has işjeň gatnaşmagynyň ýollary maslahatlaşylyp, gämi gurluşygy we deňiz infrastrukturasyny ösdürmek, saglygy goraýyş, innowasion tehnologiýalar hem-de metanyň zyňyndylaryny azaltmak ugurlaryndaky hyzmatdaşlygyň geljegi bellenildi.
Türkmen tarapy Niderlandlaryň öňdebaryjy kompaniýalarynyň ýolbaşçylarynyň Türkmenistana saparlaryny guramaga we olaryň degişli döwlet edaralarynyň hem-de işewür toparlarynyň wekilleri bilen duşuşyklaryny geçirmäge ýardam bermäge taýýardygyny bildirdi.
Duşuşykda medeni-ynsanperwer hyzmatdaşlygyň meseleleri hem ara alnyp maslahatlaşyldy. Şunuň bilen baglylykda, Limburg sebitinde atly sport we gözellik bäsleşiginiň dünýä çempionaty geçirilýändigi bellenildi. Taraplar iki ýurduň atçylyk däplerine bolan gyzyklanmasynyň medeni we jemgyýetçilik gatnaşyklaryny ösdürmäge ýardam berýändigini nygtadylar.
Duşuşygyň netijeleri boýunça başlanan dialogy dowam etdirmek we ara alnyp maslahatlaşylan başlangyçlary durmuşa geçirmek boýunça işleri dowam etdirmäge gyzyklanma bildirildi.
