Azerbaýjan Respublikasynyň Döwlet nebit kompaniýasy (SOCAR) Türkmenistanyň geljegi uly nebitgaz känlerini özleşdirmek boýunça taslamalara gatnaşmaga gyzyklanma bildirýär. Bu barada Azerbaýjanyň ykdysadyýet ministri Mikail Jabbarow Türkmenistanyň Garaşsyzlygynyň 35 ýyllygy mynasybetli geçirilen çärede aýdan sözüne salgylanyp "Report" neşiri habar berýär.
Ministriň sözlerine görä, Türkmenistanyň nebiti Azerbaýjanyň çäginden üstaşyr halkara bazarlaryna daşalýar. Jabbarow iki ýurduň hyzmatdaşlygynyň Orta geçelgäniň netijeliligini ýokarlandyrmakda möhüm ähmiýete eýedigini belläp, şol bir wagtyň özünde, üstaşyr ýük daşamalarynyň möçberiniň ýylsaýyn artýandygyny aýtdy.
"Türkmenistanyň döwrebap ulag infrastrukturasy bolup, portunyň, demir ýol ulgamynyň we beýleki logistika desgalarynyň ösdürilmegine uly möçberde maýa goýdy. Biz bu ugurda bilelikde alnyp barylýan işleriň tutuş sebite uly peýda getirjekdigine berk ynanýarys" diýip, ministr belledi.
"Report" neşiriniň habar bermegine görä, Jabbarow 2026-njy ýylyň iýulynda Aşgabatda geçirilen Ykdysady hyzmatdaşlyk boýunça hökümetara toparyň dokuzynjy mejlisinde taraplaryň söwda-ykdysady gatnaşyklar, energetika, ulag, oba hojalygy, azyk howpsuzlygy, daşky gurşawy goramak we beýleki ugurlarda hyzmatdaşlygy pugtalandyrmak meselelerini ara alyp maslahatlaşandyklaryny hem aýtdy.
Ministriň bellemegine görä, iki ýurduň hyzmatdaşlygy bilelikdäki kärhanalary we senagat toplumlaryny döretmek, şeýle hem tebigy serişdeleri gaýtadan işlemek boýunça taslamalary durmuşa geçirmek üçin hem mümkinçilikleri açýar.
