Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedow bilen Özbegistanyň Prezidenti Şawkat Mirziýoýewiň arasynda duşenbe güni geçirilen telefon arkaly söhbetdeşligiň dowamynda Samarkant şäherinde geçiriljek Türki döwletleriň guramasynyň (TDG) sammitiniň gün tertibini ara alyp maslahatlaşdylar.
Telefon arkaly geçirilen söhbetdeşligiň dowamynda türkmen-özbek dostlukly gatnaşyklaryny, hoşniýetli goňşuçylyk we strategiki hyzmatdaşlygyny ösdürmek bilen baglanyşykly birnäçe meseleler ara alnyp maslahatlaşyldy. Bu barada Özbegistanyň Prezidentiniň resmi metbugaty habar berdi.
Özbegistanyň Prezidenti Şawkat Mirziýoýew söhbetdeşligiň barşynda türkmen kärdeşi Serdar Berdimuhamedowa salamyny we iň gowy arzuwlaryny aýtdy.
Mundan başga-da, taraplar şu ýylyň oktýabr aýynda Özbegistanyň Prezidentiniň Türkmenistana amala aşyran resmi saparynyň dowamynda geçirilen ýokary derejeli duşuşuklaryň we çäreleriň netijelerine ýokary baha berdiler. Şeýle hem onuň dowamynda gazanylan we gol çekilen ylalaşyklaryň, şol sanda parlamentara işjeň gatnaşyklaryň we alyş-çalyşlaryň dowam etdirilmeginiň hem-de iş ýüzünde durmuşa geçirilmeginiň möhümdigini bellediler.
Türki döwletleriň guramasynyň (TDG) Daşary işler ministrleriniň Geňeşiniň duşuşygy 10-njy noýabrda Samarkant şäherinde geçiriler. Duşuşygyň ahyrynda birnäçe resminamalara gol çekmek dabarasy geçiriler.
Türkmenistanyň 11-nji noýabrda Samarkantda geçiriljek TDG-nyň sammitinde bu guramanyň doly agzasy bolmagyna garaşylýar.
