Türkmenistanyň Prezidenti Serdar Berdimuhamedow sişenbe güni iş sapary bilen Mary welaýatyna baryp, bu ýerde ýerine ýetirilýän möwsümleýin oba hojalyk işleriniň barşy bilen tanyşdy. Bu barada Türkmenistanyň resmi metbugaty habar berdi.
Türkmenistanyň Prezidenti Mary welaýatynda Ministrler Kabinetiniň Başlygynyň oba hojalyk, gurluşyk we senagat toplumyna gözegçilik edýän orunbasarlarynyň hem-de beýleki käbir ýolbaşçylaryň gatnaşmagynda iş maslahatyny geçirdi.
Iş maslahatynyň dowamynda obasenagat toplumyny ösdürmek we onuň kuwwatyny artdyrmak meseleleri ara alnyp maslahatlaşyldy.
Mary welaýatynda geçirilen iş maslahatynda Türkmenistanyň Ministrler Kabinetiniň Başlygynyň obasenagat toplumyna gözegçilik edýän orunbasary Annageldi Ýazmyradow, Türkmenistanyň Ministrler Kabinetiniň Başlygynyň senagat we gurluşyk toplumyna gözegçilik edýän orunbasary Çarymyrat Purçekow, Döwlet howpsuzlyk geňeşiniň sekretary, goranmak ministri Begenç Gündogdyýew, Ahal welaýatynyň merkeziniň gurluşygy boýunça döwlet komitetiniň başlygy Derýageldi Orazow we Mary welaýatynyň häkimi Döwranberdi Annaberdiýew özleriniň ýolbaşçylyk edýän düzümlerindäki işleriň alnyp barlyşy barada Döwlet Baştutanymyza hasabat berdiler.
Türkmenistanyň Prezidenti Serdar Berdimuhamedow hasabatlary diňläp, häzirki wagtda alnyp barylýan möwsümleýin oba hojalyk işleriniň depginine we hiline üns çekip, bu işleriň agrotehniki kadalara laýyklykda, öz wagtynda ýerine ýetirilmelidigini nygtady.
Döwlet Baştutanymyz iş maslahatynyň jemini jemläp, oňa gatnaşanlara öňde durýan möhüm wezipeleri ýerine ýetirmekde üstünlikleri arzuw etdi.
Şeýle hem Türkmenistanyň Prezidenti Mary welaýatyna iş saparynyň dowamynda welaýatyň ekerançylyk meýdanlarynda alnyp barylýan möwsümleýin oba hojalyk işleriniň barşy bilen, şeýle-de Garagum derýasynyň kenarlaryny berkitmek boýunça alnyp barylýan işler bilen tanyşdy.
