Türkmenistan ýurdumyzyň iň iri gaz ýataklarynyň biri bolan “Galkynyş” gaz ýatagyndan gazyň gazylyp alnyşyny düýpli ýokarlandyrmagy meýilleşdirýär. Bu barada “GaffneyCline Energy Advisory” kompaniýasynyň direktory Stiwen Trewers Aşgabatda geçirilen “Türkmenistanyň nebiti we gazy-2024” atly 29-njy Halkara maslahatyň we serginiň çäklerindäki “Tebigy gazyň – uglerody az ýangyjyň energetika geçişdäki möhüm monetizasiýasy” atly panel maslahatynda mälim etdi. Bu barada Türkmenistanyň resmi metbugaty penşenbe güni habar berdi.
“2030-njy ýyla çenli “Galkynyş” gaz ýatagyndan gündelik gazylyp alynýan gazyň möçberi 160 million kubmetre ýetirilmeli. Munuň özi ýurduň ykdysady ösüşi we energetika howpsuzlygyny berkitmek üçin täze mümkinçilikleri döreder” diýip, S.Trewers aýtdy.
Geljegi uly bu maksatlara ýetmek üçin ýatagyň işjeň ösdürilmegi, şeýle hem gazyp alýan we gaýtadan işleýän tehnologiýalaryň döwrebaplaşdyrylmagy zerurdyr. Gazyň möçberleriniň artmagy Türkmenistanyň diňe bir maliýe görkezijilerini ýokarlandyrmak bilen çäklenmän, eýsem, eksport ugurlaryny diwersifikasiýalaşdyrmaga hem mümkinçilik berer. Munuň özi döwletiň ykdysady durnuklylygyny pugtalandyrmakda möhüm orun eýelär.
Desgalara we häzirki zaman tehnologiýalara maýa goýumlar taslamanyň üstünlikli durmuşa geçirilmeginde möhüm şert bolmak bilen, gazylyp alnyşyň netijeligini ýokarlandyrar we ekologiýa töwekgelçilikleri peselder diýip, ol aýtdy.
Mundan öň, kompaniýa “Türkmengaz” döwlet konserniniň Ylmy-barlag tebigy gaz instituty bilen “Galkynyş” ýatagyny ösdürmegiň ýedi basgançakly meýilnamasynyň işlenip taýýarlanandygyny habar beripdi.
“Gaffney Cline & Associates” energetika pudagynda energetika kompaniýalara, maliýe edaralara we hökümetlere tehniki hem-de täjirçilik geňeşmeleri hödürleýän dünýä derejesindäki konsalting kompaniýasydyr. “Gaffney Cline” “Baker Hughes” kompaniýasyndan bölünip aýrylan garaşsyz kärhana bolup durýar.
