Türkmenistanda 1929-njy ýylyň 1-nji oktýabrynda döredilen Aşgabat botanika bagynyň 95 ýyllygy bellenilýär. Bu barada “Neýtralnyý Türkmenistan” gazetinde penşenbe güni habar berilýär. 18,5 gektar çägi eýeleýän bag Merkezi Aziýada iň gadymy ylmy edara hasaplanylýar. Bu ýerde ösümlikleriň dürli görnüşleriniň uly toplumy ösýär. Olaryň köpüsi daşary döwletlerden getirilen, sebitiň ýowuz howa şertlerine oňat uýgunlaşan ösümliklerdir.
Bu mirasy dowam etmek bilen, Köpetdagyň ajaýyp dag eteginde ýerleşýän Gökderede Janly tebigatyň milli muzeýi guruldy. 40 gektar çägi bolan seýilgäh haýwanlary gorap saklamagyň halkara ülňülerine laýyk gelýär we özüniň ýaşyl gurşawy bilen giňden tanalýar. Ýylda ortaça 270 müň adamyň baryp görýän seýilgähi maşgala bolup dynç alynýan meşhur ýerleriň biridir. Bu ýerde weterinar gözegçilik edarasy, karantin zolaklary, haýwanlary arassa suw bilen üpjün edýän ulgamlar bar.
Seýilgäh toplumy 2024-nji ýylda Haýwanat baglary we akwariumlar boýunça Ýewraziýa sebit birleşiginiň doly hukukly agzasy bolmak bilen arzyly sepgide ýetdi. Açylanyna 2025-nji ýylda 15 ýyl bolýan seýilgäh amatly ekologiýa şertlerinde köpelýän haýwanlara ylmy esasda ideg etmek işlerine üns bermegi dowam etdirer.
Seýilgähde haýwanlaryň dürli görnüşleri, şol sanda bir örküçli arwana we iki örküçli düýeler, awstraliýa düýeguşy, afrika buffalolary, kerk we žiraf ýaly tropiki sebitlerde ýaşaýan haýwanlar bar. Geçen iki ýylyň dowamynda bu ýerde haýwan görnüşleriniň 18-si, şol sanda krokodiller köpeldi.
2010-njy ýylda açylan wagtyndan bäri, seýilgäh toplumy Türkmenistanyň we beýleki ýurtlaryň Gyzyl kitaplaryna girizilen köp sanly görnüşleriň saklanylýan howpsuz gurşawyna öwrüldi.
