Owganystandan 115 tonna mermerden ybarat ýüküň ilkinji tapgyry Türkmenistandan üstaşyr Azerbaýjana üstünlikli gowuşdy diýip, Owganystan Biznes Habar Portalynda bellenýär.
“Bu täze ugur Azerbaýjanyň bazarlarynyň Owganystanyň önümleri bilen tanyşmagyna hem-de iki ýurduň arasynda söwda hyzmatdaşlygynyň giňeldilmegine goşant goşar” diýip, beýanatda nygtalýar.
Dabaraly açylyşa Söwda ministrlikleriniň we hususy kompaniýalaryň wekilleri gatnaşdylar.
Azerbaýjanyň Döwlet Gümrük komitetiniň maglumatyna görä, şu ýylyň ýanwar-maý aýlary boýunça Azerbaýjan bilen Owganystanyň arasyndaky söwda dolanşygy ABŞ-niň 48 million dollaryna barabar boldy.
Owganystany Türkmenistan, Azerbaýjan we Gruziýanyň üsti bilen Türkiýe Respublikasyna baglaýan halkara üstaşyr ugry bolan Lazurit koridory 2018-nji ýylda açyldy. Lazurit ulag üstaşyr koridorynyň bir bölegi bolan Serhetabat-Turgundy demir ýoly 2018-nji ýylyň Fewral aýynda açylyp ulanylmaga berildi. Bu türkmen-owgan demir ýolunyň gurluşygyny Türkmenistan dolulygyna öz üstüne aldy.
Owganystanyň Söwda-senagat edarasynyň (ACCI) maglumatyna görä, Günorta Aziýadan Ýewropa daşaljak ýükleriň 80%-i bu ugur boýunça hereket eder.
Owgan hünärmenleri ýurtda öndürilen önümleriň Türkmenistanyň üsti bilen beýleki ýurtlara ugradylmagynyň Owganystan üçin amatly şert döredýändigini we sebitdäki hyzmatdaşlygy has-da ýygjamlaşdyrýandygyny uly höwes bilen belläp geçýärler.
