Daşoguzda şalynyň täze hasyly ýygnalyp başlandy

BIZNES TÜRKMENISTAN
Daşoguzda şalynyň täze hasyly ýygnalyp başlandy
Umuman şu ýyl Daşoguz welaýatynyň daýhanlary şalynyň 35 müň tonna hasylyny ýygnap, kabul ediş ammarlaryna tabşyrmagy meýilleşdirýär.

Türkmenistanyň Daşoguz welaýatynda häzirki wagtda şaly ýygymy başlandy. Bu barada Türkmenistanyň resmi metbugaty sişenbe güni habar berdi.

Habara görä, dänäniň sorty saýlananda ýerli howa şertlerinde özüni gowy tanadan hem-de ýokary hasyllylygy bilen tapawutlanan “Nukus-2”, “Müňbaşy” we “Alenga” ýaly görnüşlere isleg bildirildi.

Saparmyrat Türkmenbaşy etrabynyň S.A.Nyýazow adyndaky we “27-nji oktýabr” ýöriteleşdirilen daýhan birleşikleriniň daýhanlary ýurduň demirgazyk sebitinde şalynyň bu görnüşiniň esasy öndürijileridir. Sebitiň daýhanlary her gektardan azyndan 40-45 sentner hasyl almagy göz öňünde tutýarlar.

Umuman şu ýyl Türkmenistanyň demirgazyk sebitiniň daýhanlary şalynyň 35 müň tonna hasylyny ýygnap, kabul ediş ammarlaryna tabşyrmagy meýilleşdirýär.

Mundan başga-da, Saparmyrat Türkmenbaşy etrabynyň çäginde döwrebap şaly arassalaýjy kärhanasy hereket edýär. Şalyny gaýtadan işleýän hususy kärhanada dünýäniň iri kompaniýalarynyň iň döwrebap enjamlary ornaşdyrylandyr. Bu kärhanada gaýtadan işlenilýän şaly ýokary hilli bolup, ýurdumyzyň bazarlarynda uly islegden peýdalanylýar.