Türkmenistanyň milli egin-eşikleri 4-nji iýulda Fransiýanyň Dowil şäherinde geçirilen “Art-Storytelling Paris–Deauville” atly halkara dizaýnerler moda sergisinde görkezildi. Bu barada Türkmenistanyň Fransiýadaky ilçihanasy habar berdi.
Sergä Türkmenistanyň Zenanlar birleşiginiň nagyş bölüminiň müdiri, dizaýner Jennet Agaýewa, Zenanlar birleşiginiň wekilleri hem-de Türkmenistanyň Fransiýadaky ilçihanasynyň işgärleri gatnaşdy. Çärä gatnaşan myhmanlar türkmen amaly-haşam sungatynyň, milli keşdeçilik däpleriniň hem-de döwrebap dizaýn çemeleşmeleriniň utgaşygyny şöhlelendirýän eserler bilen tanyşdylar.
"Art-Storytelling Paris–Deauville" halkara moda görkezilişi Fransiýadan, Wýetnamdan, Marokkodan, Gündogar Ýewropadan we Merkezi Aziýadan gelen dizaýnerleri bir ýere jemledi. Çäräniň dowamynda milli däpleri häzirki zaman modasy bilen utgaşdyrýan kolleksiýalar hödürlenip, dürli ýurtlaryň dokma we çeperçilik mirasy şöhlelendirildi. Türkmen wekiliýetiniň halkara moda çäresine gatnaşmagy Türkmenistanyň medeni mirasyny halkara derejede wagyz etmekde, ynsanperwer hyzmatdaşlygy ösdürmekde hem-de moda we döredijilik pudagynda hünär gatnaşyklaryny giňeltmekde medeni mirasyň tanyşdyrylmagyna, ynsanperwer hyzmatdaşlygyň giňeldilmegine hem-de moda we döredijilik pudagynda hünär gatnaşyklarynyň ösdürilmegine mümkinçilik berer.
Türkmenistanyň Zenanlar birleşiginiň wekillerinden we Fransiýadaky ilçihananyň işgärlerinden ybarat wekiliýet Parižde döredijilik pudaklarynda brendleri ösdürmäge bagyşlanan halkara okuw maksatnamasyna hem gatnaşdy. Okuwyň dowamynda milli medeni taslamalary halkara derejede ilerletmegiň, brendingiň we marketingiň häzirki zaman usullary boýunça ussatlyk sapaklary geçirilip, gatnaşyjylara hünär derejesini ýokarlandyrmak hakynda şahadatnamalar gowşuryldy.
