Halkara ylmy-barlag we maslahat beriş kompaniýasy “Oksford Işewürler Topary” (OIT) 1–2-nji oktýabrda Aşgabatda geçiriljek Türkmenistanyň maýa goýum forumyna (TIF 2026) ilkinji gezek Bilim boýunça hyzmatdaş hökmünde gatnaşar. Bu barada forumyň guramaçylary habar berýär.
1994-nji ýylda esaslandyrylan “Oksford Işewürler Topary” ösüp barýan bazarlardaky ykdysady barlaglara we maýa goýum seljermelerine ýöriteleşendir. Kompaniýa 40-dan gowrak ýurtda iş alyp baryp, halkara ylmy-barlag ulgamyny ýerlerdäki işleri bilen utgaşdyrýar. OIT işewürlere we döwlet edaralaryna maýa goýum mümkinçiliklerine baha bermek, pudaklaýyn ugurlara düşünmek we esaslandyrylan çözgütleri kabul etmek üçin maglumatlary we seljerme hyzmatlaryny hödürleýär. Kompaniýanyň barlaglary we seljerme işleri halkara maýadarlar, kompaniýalaryň ýolbaşçylary we döwlet işgärleri tarapyndan peýdalanylýar.
OIT-niň TIF 2026-a ilkinji gezek gatnaşmagy Türkmenistan bilen halkara bilermenlik we işewür hyzmatdaşlygyny giňeltmekde ähmiýete eýe bolup, bu hyzmatdaşlyk forumyň maýa goýum gün tertibini has giň halkara köpçüligine ýetirmäge we Türkmenistany täze hyzmatdaşlyk mümkinçiliklerini öwrenmek üçin geljegi uly ugur hökmünde görkezmäge ýardam berer.
Şeýle hem forumyň Bilim boýunça hyzmatdaşlarynyň hataryna Türkmen-Amerikan Işewürler boýunça Hyzmatdaşlyk Birleşmesi (The Turkmen-American Business Cooperation Association — TABCA) hem girýär.
Forumyň iş maksatnamasy energetika we nebithimiýa senagatynyň, Hazar sebiti hem-de Orta geçelgäni öz içine alýan ulag geçelgelerini ösdürmegiň, sanly ykdysadyýetiň we wirtual aktiwleriň, “ýaşyl” ösüş taslamalarynyň, agrosenagat toplumynyň, syýahatçylyk we şäher infrastrukturasynyň, şeýle hem suw serişdelerini dolandyrmagyň ösüşine bagyşlanar. Mundan başga-da çäräniň çäklerinde emeli aňyň ykdysadyýetde ulanylyşy we onuň maýa goýum işine täsiri boýunça aýratyn panel maslahaty hem geçiriler.
Forumyň çäklerinde döwlet edaralarynyň wekilleri bilen duşuşyklar, maýa goýum taslamalaryny durmuşa geçirmegiň hukuk we maliýe meselelerine bagyşlanan amaly seminar, şeýle hem halkara maliýe institutlary we işewür toparlary bilen işewür gatnaşyklary ýola goýmak boýunça çäreler geçiriler.
TIF 2026 halkara maslahatyna we sergisine gatnaşmak üçin forumyň resmi internet sahypasynda hasaba alynmak mümkindir: tif-turkmenistan.com
