Mahaçkalanyň deňiz söwda portunda ýeralma ýüklenen birinji gämi Türkmenistana ugramaga taýýar diýip, TASS portuň metbugat gullugyna salgylanyp habar berýär.
Mahaçkala portunyň baş direktory Murad Hidirow: “Ýeralmalar haltalara gaplanyp, Demirgazyk Osetiýadan awtoulaglar arkaly porta getirildi we “Balkan” gämisine ýüklenildi. Eksport edilýän ýüküň agramy 2 müň tonna deňdir” diýip belledi.
Hidirowyň aýtmagyna görä, portda eksport-import amallaryny amala aşyrmak üçin tehnologiýa enjamlarynyň ählisi bardyr. “"Türkmenistan" atly ýene bir gämi entek garaşyp dur. Oňa 3 müň tonnadan gowrak ýeralma ýüklener”.
Habara görä, gämileriň ahyrky barmaly nokady Türkmenbaşynyň halkara deňiz portudyr.
Baş direktoryň nygtaýyşy ýaly, Mahaçkalanyň porty Türkmenistanly telekeçiler bilen özara bähbitli ykdysady gatnaşyklaryny mundan beýläk-de giňelder.
“Geçen ýylda Türkmenistandan 2 million tonnadan gowrak nebit we nebit önümleri ýüklenip ugradyldy. 2020-nji ýylda portuň işgärleri olaryň indiki ýükleniljek möçberini ep-esli artdyrmagy meýilleşdirýärler” diýip, Hidirow sözüni jemledi.
Mahaçkala halkara söwda porty – Hazar deňziniň Günbatar kenarynda ýerleşip, Russiýanyň Hazar deňzinde doňmaýan porty hasaplanýar.
