Ahal welaýatynyň Ak bugdaý etrabynda ýerleşýän “Berk ýelim” hususy kärhanasy 2021-nji ýylda içki we daşky diwar üçin niýetlenen boýaglaryň önümçiligini ýola goýdy. Bu barada “Rysgal” gazeti duşenbe güni habar berdi.
“Berk ýelim” hususy kärhanasy 2013-nji ýylda esaslandyrylyp, kompaniýa ilkibaşda kafel üçin niýetlenen “Klas-kim” haryt nyşanly ýelim öndürip başlady.
Boýaglar 20 kilogramlyk, kafel üçin ýelim 25 kilogramlyk gutulara gaplanylýar. Kärhananyň Türkiýe Respublikasynyň tehnikadyr tehnologiýalary bilen üpjün edilmegi bu ýerde ýylda 6 müň tonna golaý önüm öndürmäge mümkinçilik berýär.
Häzirki wagtda kärhanada onlarça hünärmen zähmet çekýär. Önümçilikde ýerli we daşary ýurt çig malyndan peýdalanylýar.
Kärhana geljekde önümçiliginiň gerimini giňeltmegi hem-de önümlerini daşarky bazara çykarmagy maksat edinýär.
